ਗੁਰਦਾਸ ਮਾਨ ਹੁਣ ਦਸਮ ਗ੍ਰੰਥ ਦੇ ਮਹਾਂਵਾਕ ਦੀ ਬੇਅਦਬੀ ਕਰਨ ਕਾਰਨ ਉਲਝੇ

ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਗੁਰਦਾਸ ਮਾਨ ਵਿਰੁੱਧ ਕਰੇਗੀ ਕਾਰਵਾਈ : ਭਾਈ ਲੋਂਗੋਵਾਲ

ਗੁਰਦਾਸ ਮਾਨ ਮਾਫੀ ਮੰਗੇ : ਪੰਡਤ ਰਾਓ ਧਰੇਨਵਰ

ਪਟਿਆਲਾ : ਪੰਜਾਬੀ ਗਾਇਕ ਗੁਰਦਾਸ ਮਾਨ ਇਕ ਤੋਂ ਇਕ ਨਵੇਂ ਵਿਵਾਦ ਵਿੱਚ ਉਲਝਦੇ ਜਾ ਰਹੇ ਹਨ, ਅੱਜ ਉਨ੍ਹਾਂ ਦੀ ਇਕ ਹੋਰ ਵੀਡੀਓ ਵਾਇਰਲ ਹੋਈ ਹੈ ਜਿਸ ਵਿਚ ਉਨ੍ਹਾਂ ਨੇ ਦਸਮ ਗ੍ਰੰਥ ਵਿਚਲੇ ਮਹਾਂਵਾਕ ਦੀ ਬੇਅਦਬੀ ਕਰ ਦਿੱਤੀ ਹੈ। ਉਹ ਸਟੇਜ਼ ਤੇ ਗਾ ਰਹੇ ਹਨ, ‘‘ਦੇਹ ਸਿਵਾ ਬਰੁ ਮੋਹਿ ਇਹੈ ਸੁਭ ਕਰਮਨ ਤੇ ਕਬਹੂੰ ਨ ਟਰੋ।  ਡਰੋ ਅਰਿ ਸੋ ਜਬ ਜਾਇ ਲਰੇ ਨਿਸਚੈ ਕਰਿ ਅਪੁਨੀ ਜੀਤ ਕਰੋ। ਦੇਹ ਸ਼ਿਵਾ... ਓਮ ਨਮੋ ਸ਼ਿਵਾਏ.. ਓਮ ਨਮੋ ਸ਼ਿਵਾਏ..ਬਮ ਬਮ....’’
ਦਸਮ ਗ੍ਰੰਥ ਵਲੋਂ ਲਏ ਇਸ ਮਹਾਵਾਕ ਨੂੰ ਸਨਾਤਨ ਧਰਮ ਦੇ ਦੇਵਤੇ ਨਾਲ ਸਿੱਧਾ ਜੋੜਨ ਦਾ ਕਾਰਨ ਕਈ ਵਿਦਵਾਨ ਸਿੱਧੇ ਤੌਰ ਤੇ ਹੀ ਕਹਿੰਦੇ ਹਨ ਕਿ ਇਹ ਸਿਵਜੀ ਤੋ਼ ਵਰਦਾਨ ਮੰਗਿਆ ਗਿਆ ਹੈ।  ਜਿਵੇਂ ਡਾ. ਰਤਨ ਸਿੰਘ ਜੱਗੀ ਇਸ ਸ਼ਬਦ ਦੀ ਵਿਆਖਿਆ ਇੰਜ ਕਰਕੇ ਹਨ ‘ਹੇ ਸ਼ਿਵਾ! ਮੈਨੂੰ ਇਹ ਵਰ ਦੇ ਕਿ (ਮੈਂ) ਸ਼ੁਭ ਕੰਮਾਂ (ਨੂੰ ਕਰਨੋ) ਨ ਟਲਾਂ। ਜਦੋਂ ਵੈਰੀ ਨਾਲ (ਰਣ-ਭੂਮੀ ਵਿੱਚ ਜਾ ਕੇ) ਲੜਾਂ ਤਾਂ (ਜ਼ਰਾ) ਨ ਡਰਾਂ ਅਤੇ ਨਿਸ਼ਚੇ ਹੀ ਆਪਣੀ ਜਿਤ ਪ੍ਰਾਪਤ ਕਰਾਂ।’
ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿਚ ਸਿਵ ਸ਼ਬਦ ਕਈ ਵਾਰੀ ਆਇਆ ਹੈ ਪਰ ਇਨ੍ਹਾਂ ਸ਼ਬਦਾਂ ਦਾ ਭਾਵ ਕੀ ਹੈ ਇਸ ਬਾਰੇ ਹੇਠਾਂ ਕੁਝ ਪੰਕਤੀਆਂ ਦਿੱਤੀਆਂ ਹਨ
1. ਸਿਵ ਸਿਵ ਕਰਤੇ ਜੋ ਨਰੁ ਧਿਆਵੈ॥ਬਰਦ ਚਢੇ ਡਉਰੂ ਢਮਕਾਵੈ॥ ਪੰਨਾ 874॥
ਇਹਨਾ ਪੰਗਤੀਆ ਦਾ ਅਰਥ ਹੈ ਕਿ ਜੋ ਵੀ ਆਦਮੀ ਸ਼ਿਵਜੀ ਨੂੰ ਧਿਆੳਂਦਾ ਹੈ ਉੱਹ ਜ਼ਿਆਦਾ ਤੋਂ ਜ਼ਿਆਦਾ ਬਲਦ ਤੇ ਚੜ੍ਹ ਕੇ ਡਉਰੂ ਹੀ ਵਜਾ ਸਕਦਾ ਹੈ।
2. ਹੈ ਨਾਹੀ ਕੋਊ ਬੂਝਨਹਾਰੈ ਜਾਨੈ ਕਵਨ ਭਤਾ॥  ਸਿਵ ਬਿਰੰਚਿ ਅਰੁ ਸਗਲ ਮੋਨਿ ਜਨ ਗਹਿ ਨ ਸਕਾਹਿ ਗਤਾ॥ ਮ:5,ਪੰਨਾ 498॥
ਇਨ੍ਹਾਂ ਪੰਗਤੀਆ ਵਿੱਚ ਵੀ ਗੁਰੂ ਸਾਹਿਬਾਂ ਇਹ ਬਿਆਨ ਕੀਤਾ ਹੈ ਕਿ ਸ਼ਿਵਜੀ ਤੇ ਬ੍ਰਹਮਾ ਵੀ ਪ੍ਰਮਾਤਮਾ ਦੇ ਸਹੀ ਸਰੂਪ ਨੂੰ ਨਹੀ ਸਮਝ ਸਕੇ।
3.  ਕਰਣ ਪਲਾਹ ਕਰਹਿ ਸਿਵ ਦੇਵ॥ ਤਿਲੁ ਨਹੀ ਬੂਝਹਿ ਅਲਖ ਅਭੇਵ॥ਪੰਨਾ 867,ਮ:5॥
ਸ਼ਿਵਜੀ ਅਤੇ ਹੋਰ ਅਨੇਕਾਂ ਦੇਵਤੇ ਪ੍ਰਮਾਤਮਾ ਦੇ ਅਸਲੀ ਸਰੂਪ ਨੂੰ ਬਿਆਨ ਕਰਨ ਲਈ ਤਰਲੇ ਲੈਂਦੇ ਹਨ ਪਰ ਇੱਕ ਤਿਲ ਜਿਨ੍ਹਾ ਵੀ ਪ੍ਰਮਾਤਮਾ ਦਾ ਸਰੂਪ ਬਿਆਨ ਨਹੀ ਕਰ ਸਕੇ।
4.  ਇਸ ਧਨ ਕਾਰਣਿ ਸਿਵ ਸਨਕਾਦਿਕ ਖੋਜਤ ਭਏ ਉਦਾਸੀ॥ ਮਨਿ ਮੁਕੰਦੁ ਜਿਹਬਾ ਨਾਰਾਇਨੁ ਪਰੈ ਨ ਜਮ ਕੀ ਫਾਸੀ॥ ਕਬੀਰ,ਪੰਨਾ 336॥
ਇਸ ਮਾਇਆ ਦੀ ਖਾਤਰ ਸ਼ਿਵ ਜੀ ਤੇ ਸਨਕਾਦਿਕ (ਬ੍ਰਹਮਾ ਦੇ ਚਾਰੇ ਪੁਤਰ) ਵਿਰੱਕਤ ਹੋ ਗਏ। ਜਿਸ ਦੇ ਮਨ ਔਰ ਜੀਭਾ ਤੇ ਪ੍ਰਮਾਤਮਾ ਦਾ ਨਾਮ ਹੋਵੇ ਉੱਸਨੂੰ ਜਮ (ਮਾਇਆ ਦਾ ਮੋਹ) ਦੀ ਫਾਂਸੀ ਨਹੀਂ ਪੈ ਸਕਦੀ।
5.  ਅੰਤੁ ਨ ਪਾਵਤ ਦੇਵ ਸਬੈ ਮੁਨਿ ਇਦ੍ਰ ਮਹਾ ਸਿਵ ਜੋਗ ਕਰੀ॥ ਫੁਨਿ ਬੇਦ ਬਿਰੰਚਿ ਰਹਿਓ ਹਰਿ ਜਾਪ ਨ ਛਾਡਯਓ ਏਕ ਘਰੀ॥ਭੱਟ,ਪੰਨਾ 1409॥ ਇੰਦਰ ਤੇ ਸ਼ਿਵਜੀ ਨੇ ਯੋਗ ਸਾਧਨਾ ਕੀਤੀ, ਬ੍ਰਹਮਾ ਵੇਦ ਵਿਚਾਰ ਕੇ ਥੱਕ ਗਿਆ, ਉੱਸਨੇ ਹਰੀ ਦਾ ਜਾਪ ਇੱਕ ਘੜੀ ਨਹੀਂ ਛੱਡਿਆ, ਪਰ ਇਨ੍ਹਾਂ ਸਾਰਿਆਂ ਦੇਵਤਿਆਂ ਤੇ ਮੁਨੀਆਂ ਨੇ (ਗੁਰੂ ਅਰਜਨੁ ਦਾ) ਅੰਤ ਨਹੀ ਪਾਇਆ। ਪ੍ਰੋ: ਸਾਹਿਬ ਸਿੰਘ ਵਿਆਖਿਆਕਾਰ।
ਇਸ ਕਰਕੇ ਸਿੱਖਾਂ ਨੇ ਗੁਰਦਾਸ ਮਾਨ ਨੂੰ ਘੇਰਿਆ ਹੈ। ਸਿੱਖ ਵਿਦਵਾਨ ਬਲਵਿੰਦਰ ਜਾਤੀਵਾਲ ਕਹਿ ਰਹੇ ਹਨ ਕਿ ਗੁਰਦਾਸ ਮਾਨ ਨੇ ਪਹਿਲਾਂ ਪੰਜਾਬੀ ਮਾਂ ਬੋਲੀ ਨਾਲ ਧੋਖਾ ਕੀਤਾ ਹੁਣ ਇਹ ਸਾਡੇ ਧਾਰਮਿਕ ਮੁੱਦਿਆਂ ਤੇ ਵੀ ਦਖਲ ਅੰਦਾਜੀ ਕਰ ਰਿਹਾ ਹੈ, ਜੋ ਬਰਦਾਸਤ ਨਹੀਂ ਹੁੰਦੇ।
ਉਧਰ ਅੱਜ ਪਿੰਡ ਟੌਹੜਾ ਵਿਚ ਆਏ ‌ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਭਾਈ ਗੋਬਿੰਦ ਸਿੰਘ ਲੌਂਗੋਵਾਲ ਨੇ ਕਿਹਾ ਹੈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਗੁਰਦਾਸ ਮਾਨ ਵਿਰੁੱਧ ਕਾਰਵਾਈ ਕਰੇਗੀ।
ਉਧਰ ਪੰਜਾਬੀ ਅਤੇ ਪੰਜਾਬੀਅਤ ਤੇ ਪਹਿਰੇਦਾਰ ਪੰਡਿਤਰਾਓ ਧਰੇਨਵਰ ਨੇ ਪਟਿਆਲਾ ਦੇ ਬੱਸ ਸਟੈਂਡ ਤੋਂ ਗੁਰਦੁਆਰਾ ਦੁਖ ਨਿਵਾਰਨ ਸਾਹਿਬ ਤੱਕ ਮਾਰਚ ਕੀਤਾ ਤੇ ਗੁਰਦੁਆਰਾ ਸਾਹਿਬ ਵਿਚ ਆਕੇ ਕਿਹਾ ਕਿ ਗੁਰਦਾਸ ਮਾਨ ਨੂੰ ਤੁਰੰਤ ਮਾਫੀ ਮੰਗਣੀ ਚਾਹੀਦੀ ਹੈ।