ਗੁਰਦਾਸ ਮਾਨ ਭਾਸ਼ਾ ਵਿਗਿਆਨੀ ਨਹੀਂ ਉਹ ਸਿਰਫ ਪੈਸੇ ਦਾ ਪੁੱਤ : 300 ਪੰਜਾਬੀ ਲੇਖਕ

-ਆਉਂਦੇ ਦਿਨਾ ਵਿਚ ਹੰਸ ਰਾਜ ਹੰਸ ਵਾਂਗ ਭਾਜਪਾ ਵਿਚ ਸ਼ਾਮਲ ਹੋਣ ਦੀਆਂ ਚਰਚਾਵਾਂ

-ਪੰਜਾਬੀ ਬੋਲੀ ਤੋਂ ਕਰੋੜਾਂ ਰੁਪਏ ਕਮਾਉਣ ਵਾਲੇ ਗੈਕ ਗੁਰਦਾਸ ਮਾਨ ਨੇ ਆਪਣੀ ਮਾਂ ਬੋਲੀ ਨੂੰ ਪਿੱਠ ਦਿਖਾਈ 

ਬਰਨਾਲਾ :ਬਰਨਾਲਾ ਵਿਖੇ ਹੋਈ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀ ਪੰਜਾਬੀ ਬਚਾਓ ਕਾਨਫਰੰਸ ਵਿੱਚ ਹਾਜ਼ਰ ਤਿੰਨ ਸੌ ਲੇਖਕਾਂ ਨੇ

ਗੁਰਦਾਸ ਮਾਨ ਵੱਲੋਂ ਪੰਜਾਬੀ ਮਾਂ ਮਾਂ ਦੇ ਵਿਰੁੱਧ ਜਾਕੇ ਹਿੰਦੀ ਨੂੰ ਸਮੁੱਚੇ ਭਾਰਤ ਦੀ ਭਾਸ਼ਾ ਬਣਾਉਣ ਦਾ ਵਿਰੋਧ ਕੀਤਾ ਹੈ, ਇੱਥੇ ਕਿਹਾ ਗਿਆ ਕਿ ਗੁਰਦਾਸ ਮਾਨ ਕੋਈ ਭਾਸ਼ਾ ਵਿਗਿਆਨੀ ਨਹੀਂ ਹੈ ਉਹ ਤਾਂ ਸਿਰਫ਼ ਪੈਸੇ ਦਾ ਪੁੱਤ ਹੈ, ਪੰਜਾਬੀ ਮਾਂ ਦੇ ਨਾਂ ਤੇ ਖਾਣ

ਵਾਲੇ ਹੰਸ ਰਾਜ ਹੰਸ ਭਾਜਪਾ ਵਿਚ ਸ਼ਾਮਲ ਹੋਕੇ ਐਮ ਪੀ ਬਣ ਗਏ ਹਨ ਆਉਂਦੇ ਦਿਨਾਂ ਵਿੱਚ ਗੁਰਦਾਸ ਮਾਨ ਦੇ ਭਾਜਪਾ ਵਿਚ ਸ਼ਾਮਲ ਹੋਣ ਦੇ ਚਰਚੇ ਸ਼ੁਰੂ ਹੋ ਗਏ ਹਨ, ਕਿਉਂਕਿ ਉਸ ਨੇ ਭਾਜਪਾ ਦੇ ਗ੍ਰਹਿ ਮੰਤਰੀ ਦੀ ਬੋਲੀ ਵਿਚ ਆਪਣਾ ਬੋਲ ਮਿਲਾਇਆ ਹੈ।

          ਪਿਛਲੇ ਦਿਨੀਂ ਭਾਰਤ ਉਤੇ ਰਾਜ ਕਰ ਰਹੀ ਆਰ.ਐਸ.ਐਸ. ਦੀ ਹਾਂ ਵਿੱਚ ਹਾਂ ਮਿਲਾਉਂਦਿਆਂ ਇੱਕ ਰਾਸ਼ਟਰ, ਇੱਕ ਭਾਸ਼ਾ ਅਤੇ ਇੱਕ ਸੰਸਕ੍ਰਿਤੀ ਸ਼੍ਰੀ ਅਮਿਤ ਸ਼ਾਹ ਹੋਮ ਮਨਿਸਟਰ ਭਾਰਤ ਸਰਕਾਰ ਅਤੇ ਸਮੁੱਚੀ ਆਰ.ਐਸ.ਐਸ. ਦੇ ਨਾਹਰੇ ਦਾ ਸਮਰਥਨ ਕਰਦਿਆਂ ਪ੍ਰਸਿੱਧ ਡਫ਼ਲੀਬਾਜ ਗੈਕ (ਗਾਇਕ ਨਹੀਂ) ਗੁਰਦਾਸ ਮਾਨ ਨੇ ਕਿਹਾ ਕਿ ਜੇ ਜਰਮਨ, ਫਰਾਂਸ, ਜਪਾਨ ਦੀ ਇੱਕ ਭਾਸ਼ਾ, ਇੱਕ ਦੇਸ਼ ਹੋ ਸਕਦੀ ਹੈ ਤਾਂ ਭਾਰਤ ਦੀ ਇੱਕ ਭਾਸ਼ਾ ਹਿੰਦੀ ਹੋਣ ਵਿੱਚ ਕੀ ਇਤਰਾਜ ਹੈ। ਭਾਰਤ ਦੀ ਇੱਕੋ ਇੱਕ ਭਾਸ਼ਾ ਹਿੰਦੀ ਹੀ ਹੋਣੀ ਚਾਹੀਦੀ ਹੈ। ਡਾ. ਤੇਜਵੰਤ ਮਾਨ ਪ੍ਰਧਾਨ ਕੇਂਦਰੀ ਪੰਜਾਬੀ ਲੇਖਕ ਸਭਾ ਨੇ ਗੁਰਦਾਸ ਮਾਨ ਵੱਲੋਂ ਉਪਰੋਕਤ ਕਹੇ ਗਏ ਸ਼ਬਦਾਂ ਦਾ ਸਖਤ ਸ਼ਬਦਾਂ ਵਿੱਚ ਖੰਡਨ ਕਰਦਿਆਂ ਕਿਹਾ ਕਿ ਗੁਰਦਾਸ ਮਾਨ ਕੋਈ ਭਾਸ਼ਾ ਵਿਗਿਆਨੀ ਨਹੀਂ, ਸਗੋਂ ਪੈਸੇ ਦਾ ਪੁੱਤ ਹੈ। ਪੈਸਾ ਉਸਦੇ ਦਮਾਗ ਨੂੰ ਚੜ੍ਹ ਗਿਆ। ਇੱਕ ਗਿਆਨਹੀਣ ਗੈਕ ਜਿਨ੍ਹਾਂ ਪੰਜਾਬੀ ਭਾਸ਼ਾ ਨਾਲ ਪਿਆਰ ਕਰਨ ਵਾਲਿਆਂ ਨੂੰ ਵਿਹਲੜ ਰੌਲਾ ਪਾਊ ਦੱਸਦਾ ਹੈ, ਉਨ੍ਹਾਂ ਵਿੱਚ ਸ਼੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ, ਸ਼੍ਰੋਮਣੀ ਗੁਰਦੁਆਰਾ ਕਮੇਟੀ ਦੇ ਸਮੂਹ ਮੈਂਬਰ, ਦਮਦਮੀ ਟਕਸਾਲ ਦੇ ਚਿੰਤਕ, ਸਮੁੱਚੀਆਂ ਸਮਾਜਵਾਦੀ ਮਾਰਕਸਵਾਦੀ ਧਿਰਾਂ ਦੇ ਵਿਦਵਾਨ ਆਗੂ, ਕਿਸਾਨ ਜਥੇਬੰਦੀਆਂ ਦੇ ਆਗੂ, ਵਿਦਿਆਰਥੀ ਜਥੇਬੰਦੀਆਂ ਦੇ ਮੈਂਬਰ ਅਤੇ ਪੰਜਾਬ ਦੇ ਪ੍ਰਸਿੱਧ ਲੇਖਕ, ਵਿਦਵਾਨ, ਬੁੱਧੀਜੀਵੀ, ਪੰਜਾਬ ਵਿੱਚ ਕੰਮ ਕਰ ਰਹੀਆਂ ਜਥੇਬੰਦੀਆਂ, ਸਾਹਿਤ ਸਭਾਵਾਂ, ਕੇਂਦਰੀ ਪੰਜਾਬੀ ਲੇਖਕ ਸਭਾਵਾਂ, ਸੱਭਿਆਚਾਰ ਨਾਟ ਮੰਡਲੀਆਂ ਦੇ ਮੈਂਬਰ ਆਦਿ ਸ਼ਾਮਲ ਹਨ। ਗੁਰਦਾਸ ਮਾਨ ਦੀ ਗੈਕੀ ਸਮਝ ਇਹ ਹੈ ਕਿ ਸਾਰੇ ਵਿਹਲੜ ਹਨ। ਡਾ. ਮਾਨ ਨੇ ਸਪੱਸ਼ਟ ਕੀਤਾ ਕਿ ਇੱਕ ਅਨਪੜ੍ਹ ਨੂੰ ਇਹ ਵੀ ਨਹੀਂ ਪਤਾ ਜਰਮਨੀ, ਫਰਾਂਸ, ਜਪਾਨ ਅੰਦਰ ਕੋਈ ਰਾਸ਼ਟਰ ਵੱਖਰਾ ਨਹੀਂ। ਉਹ ਜਰਮਨ, ਫਰਾਂਸੀਸੀ ਜਾਂ ਜਾਪਾਨੀ ਹਨ ਪਰ ਭਾਰਤ ਦਾ ਸੰਵਿਧਾਨ ਮੰਨਦਾ ਹੈ ਕਿ ਭਾਰਤ ਇੱਕ ਸੰਘੀ ਦੇਸ਼ ਹੈ। ਇਸ ਵਿੱਚ ਬਾਈ ਰਾਸ਼ਟਰੀ ਭਾਸ਼ਾਵਾਂ ਹਨ। ਜੇਕਰ ਬਾਈ ਰਾਸ਼ਟਰੀ ਭਾਸ਼ਾਵਾਂ ਤਾਂ  ਭਾਰਤ ਘੱਟੋ ਘੱਟ ਬਾਈ ਰਾਸ਼ਟਰਾਂ ਦਾ ਸੰਘ ਤਾਂ ਹੈ ਹੀ। ਹਕੀਕਤ ਵਿੱਚ ਭਾਰਤ ਇੱਕ ਰਾਸ਼ਟਰੀ, ਇੱਕ ਭਾਸ਼ਾ, ਇੱਕ ਸੱਭਿਆਚਾਰੀ ਕਦੇ ਰਿਹਾ ਹੀ ਨਹੀਂ ਅਤੇ ਨਾ ਹੈ। ਇਹ ਬਹੁਵਾਦ ਸਿਧਾਂਤ ਅਨੁਸਾਰ ਬਹੁਰਾਸ਼ਟਰੀ, ਬਹੁਭਾਸ਼ੀ, ਬਹੁਸੱਭਿਆਚਾਰੀ ਦੇਸ਼ ਹੈ, ਆਰ.ਐਸ.ਐਸ. ਅਤੇ ਰਾਜ ਸੱਤਾ ਪ੍ਰਾਪਤ ਧਿਰ ਇਸੇ ਦੇਸ਼ ਨੂੰ ਹਿੰਦੂਮੁਸਲਿਮ ਵਜੋਂ ਭਾਰਤ ਨੂੰ ਹਿੰਦੂ ਰਾਸ਼ਟਰ ਬਣਾਉਣ ਦੀ ਸਾਜਿਸ਼ ਕਰ ਰਹੀ ਹੈ, ਜਿਸਦਾ ਸਮਰਥਨ ਗੁਰਦਾਸ ਮਾਨ ਅਤੇ ਇਸ ਇੱਕ ਹੋਰ ਸਾਥੀ ਹੰਸ ਰਾਜ ਹੰਸ ਕਰ ਰਹੇ ਹਨ। ਹੰਸ ਰਾਜ ਹੰਸ ਤਾਂ ਐਮ.ਪੀ ਬਣ ਗਿਆ। ਗੁਰਦਾਸ ਮਾਨ ਵੱਲੋਂ ਕੀਤੀ ਜਾ ਰਹੀ ਸ਼੍ਰੀ ਅਮਿਤ ਸ਼ਾਹ ਦੀ ਚਮਚਾਗਿਰੀ ਦਾ ਅਰਥ ਉਸਦਾ ਨਿਕਟ ਭਵਿੱਚ ਵਿੱਚ ਭਾਜਪਾ ਵਿੱਚ ਸ਼ਾਮਲ ਹੋਣ ਦਾ ਹੈ।

ਬਰਨਾਲਾ ਵਿਖੇ ਹੋਈ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੀ ਪੰਜਾਬੀ ਬਚਾਓ ਕਾਨਫਰੰਸ ਵਿੱਚ ਹਾਜ਼ਰ ਤਿੰਨ ਸੌ ਲੇਖਕਾਂ ਨੇ ਡਾ. ਮਾਨ ਦੀ ਹਾਮੀ ਭਰੀ। ਇੰਨ੍ਹਾਂ ਲੇਖਕਾਂ ਵਿੱਚ ਓਮ ਪ੍ਰਕਾਸ਼ ਗਾਸੋ, ਡਾ. ਨਰਵਿੰਦਰ ਸਿੰਘ ਕੌਸ਼ਲ, ਜਗੀਰ ਸਿੰਘ ਜਗਾਤਾਰ, ਡਾ. ਭਗਵੰਤ ਸਿੰਘ, ਭਾਰਤੀ ਸਾਹਿਤ ਅਕਾਡਮੀ ਪੁਰਸਕਾਰ ਜੇਤੂ ਪਵਨ ਹਰਚੰਦਪੁਰੀ, ਡਾ. ਜ਼ੋਗਿੰਦਰ ਸਿੰਘ ਨਿਰਾਲਾ, ਪ੍ਰੋ. ਸੰਧੂ ਵਰਿਅਣਵੀ, ਡਾ. ਸੰਪੂਰਨ ਸਿੰਘ ਟੱਲੇਵਾਲੀਆ, ਪ੍ਰਸਿੱਧ ਲੋਕ ਗਾਇਕ ਜਗਰਾਜ ਧੌਲਾ, ਡਾ. ਤੇਜਾ ਸਿੰਘ ਤਿਲਕ, ਗੁਲਜ਼ਾਰ ਸਿੰਘ ਸ਼ੌਂਕੀ, ਡਾ. ਸੁਰਿੰਦਰ ਭੱਠਲ, ਮਿੰਦਰ ਪਾਲ ਭੱਠਲ, ਡਾ. ਤਰਸਪਾਲ ਕੌਰ, ਕਹਾਣੀਕਾਰ ਅਤਰਜੀਤ, ਗੁਰਚਰਨ ਕੌਰ ਕੋਚਰ, ਡਾ. ਭੁਪਿੰਦਰ ਸਿੰਘ ਬੇਦੀ, ਜਗਤਾਰ ਕੱਟੂ, ਅਮਨਦੀਪ ਸਿੰਘ ਟੱਲੇਵਾਲੀਆ, ਸੁਖਦੇਵ ਔਲਖ, ਨਿਰਪਾਲ ਸਿੰਘ, ਨਵਰਾਹੀ ਘੁਗਿਆਣਵੀ, ਮਿੰਠਾ ਸਿੰਘ ਸੇਖੋਂ, ਜਗਦੀਸ਼ ਕੂਲਰੀਆਂ, ਸੁਰਿੰਦਰ ਕੌਰ ਰਸੀਆ, ਬਿੱਕਰ ਸਿੰਘ ਸਿੱਧੂ, ਕਰਤਾਰ ਠੁੱਲੀਵਾਲ, ਸੁਰਜੀਤ ਦਿਹੜ, ਸਾਗਰ ਸਿੰਘ ਸਗਾਰ, ਭਗਤੂ ਬੋਲੀਆਂ ਵਾਲਾ, ਭੋਲਾ ਸਿੰਘ ਸੰਘੇੜਾ, ਬਲਵੀਰ ਬੱਲੀ, ਅਵਤਾਰ, ਸੰਧੂ ਆਦਿ ਸ਼ਾਮਲ ਸਨ। ਇਸ ਦੌਰਾਨ ਮਾਲਵਾ ਰਿਸਰਚ ਸੈਂਟਰ ਦੇ ਸਰਪ੍ਰਸਤ ਤੇ ਵਿਸ਼ਵ ਚਿੰਤਕ ਦਾ ਡਾ. ਸਵਰਾਜ ਸਿੰਘ ਨੇ ਗੁਰਦਾਸ ਮਾਨ ਵੱਲੋਂ ਕੈਨੇਡਾ ਵਿਖੇ ਸ਼ੋਅ ਦੌਰਾਨ ਪੰਜਾਬੀ ਔਰਤਾਂ ਬੱਚਿਆਂ ਦੀ ਮੌਜੂਦਗੀ ਵਿੱਚ ਵਰਤੀ ਭੈੜੀ ਸ਼ਬਦਾਵਲੀ ਨੂੰ ਅਸੱਭਿਅਕ ਕਰਾਰ ਦਿੱਤਾ, ਅਤੇ ਇੱਕ ਭਾਸ਼ਾ ਇੱਕ ਰਾਸ਼ਟਰ ਦੀ ਵਕਾਲਤ ਕਰਕੇ ਸਮੁੱਚੇ ਪੰਜਾਬੀ ਪਿਆਰਿਆਂ ਦੇ ਜਜ਼ਬਾਤਾਂ ਨੂੰ ਠੇਸ ਪਹੁੰਚਾਈ ਹੈ। ਇਹ ਕਾਰਵਾਈ

ਅਤਿ ਨਿੰਦਣਯੋਗ ਹੈ।
ਜਾਰੀ ਕਰਤਾ: ਡਾ. ਭਗਵੰਤ ਸਿੰਘ ਬੁਲਾਰਾ, ਕੇਂਦਰੀ ਪੰਜਾਬੀ ਲੇਖਕ ਸਭਾ ਸੇਖੋਂ।ਫੋਨ 9814851500