ਡਾ. ਹੁਕਮ ਚੰਦ ਰਾਜਪਾਲ ਨੇ ਪੰਜਾਬੀਆਂ ਤੋਂ ਮਾਫ਼ੀ ਮੰਗੀ

ਮੇਰੇ ਵਰਗੇ ਅਕਾਦਮਿਸ਼ਨਾ ਨੂੰ ਭਾਸ਼ਾ ਦੀ ਸਿਆਸਤ ਵਿਚ ਨਾ ਘੜੀਸਿਆ ਜਾਵੇ: ਡਾ. ਰਾਜਪਾਲ

ਪਟਿਆਲਾ : ਹਿੰਦੀ ਦਿਵਸ ਮੌਕੇ ਸਮਾਗਮ ਦੀ ਪ੍ਰਧਾਨਗੀ ਕਰ ਰਹੇ ਹਿੰਦੀ ਦੇ ਵਿਦਵਾਨ ਡਾ. ਹੁਕਮ ਚੰਦ ਰਾਜਪਾਲ ਨੇ ਹਿੰਦੀ ਦਿਵਸ ਮੌਕੇ ਹੋਏ ਝਗੜ ਸਬੰਧੀ ਸਪਸ਼ਟੀਕਰਨ ਦਿੱਤਾ ਹੈ। ਉਨ੍ਹਾਂ ਸਪਸ਼ਟ ਸ਼ਬਦਾਂ ਵਿਚ ਕਿਹਾ ਕਿ ‘ਮੇਰੇ ਵਰਗੇ ਅਕਾਦਮਿਸ਼ਨ ਨੂੰ ਭਾਸ਼ਾ ਦੀ ਸਿਆਸਤ ਵਿਚ ਨਾ ਘੜੀਸਿਆ ਜਾਵੇ।
ਉਨ੍ਹਾਂ ਆਪਣਾ ਸਪਸ਼ਟੀਕਰਨ ਪੰਜਾਬੀ ਵਿਚ ਟਾਈਪ ਕੀਤੀ ਇਬਾਰਤ ਰਾਹੀਂ ਦਿੱਤਾ ਹੈ ਅਤੇ ਹੇਠਾਂ ਹਿੰਦੀ ਵਿਚ ਦਸਤਖ਼ਤ ਵੀ ਕੀਤੇ ਹਨ, ਉਨ੍ਹਾਂ ਕਿਹਾ ਹੈ ਕਿ ਜਿਸ ਫੰਕਸ਼ਨ ਵਿਚ ਕੀਤੀ ਗਈ ਟਿੱਪਣੀ ਨਾਲ ਪੰਜਾਬੀ ਪਿਆਰਿਆਂ ਦੇ ਮਨਾਂ ਨੂੰ ਠੇਸ ਪਹੁੰਚੀ ਹੈ, ਉਸ ਫੰਕਸ਼ਨ ਦੀ ਮੈਂ ਪ੍ਰਧਾਨਗੀ ਕਰ ਰਿਹਾ ਸੀ। ਅਕਾਦਮਿਕ ਖੇਤਰ ਵਿਖੇ ਮੇਰੀ ਪੰਜਾਬੀ ਪਹੁੰਚ ਬਾਰੇ ਮੇਰੇ ਸਹਿਯੋਗੀ ਜਾਣਦੇ ਹਨ, ਉਨ੍ਹਾਂ ਦਾਅਵਾ ਕੀਤਾ ਕਿ ਉਨ੍ਹਾਂ ਨੂੰ ਜਾਣਨ ਵਾਲਿਆਂ ਦੀ ਲਿਸਟ ਬਹੁਤ ਲੰਮੀ ਹੈ। ਉਨ੍ਹਾਂ ਅੱਗੇ ਲਿਖਿਆ ਹੈ ਕਿ ਮੈਂ ਕਹਿਣਾ ਚਾਹੁੰਦਾ ਹਾਂ ਕ ਹਿੰਦੀ ਰਾਹੀਂ ਪੰਜਾਬੀ ਦੀ ਸੇਵਾ ਕਰਦਾ ਰਿਹਾ ਹਾਂ ਅਤੇ ਉਮਰ ਦੇ ਇਸ ਪੜਾਅ ਤੇ ਵੀ ਸਮਰੱਥਾ ਮੁਤਾਬਿਕ ਕਰੀ ਜਾ ਰਿਹਾ ਹਾਂ।ਇਸ ਦਾ ਪ੍ਰਗਟਾਵਾ ਭਾਸ਼ਾ ਵਿਭਾਗ ਅਤੇ ਵਰਲਡ ਪੰਜਾਬੀ ਸੈਂਟਰ ਦੇ ਪਲੇਟਫ਼ਾਰਮ ਤੋਂ ਹੁੰਦਾ ਰਹਿੰਦਾ ਹੈ। ਮੈਂ ਸੁਪਨੇ ਵਿਚ ਵੀ ਪੰਜਾਬੀ ਬੋਲੀ ਦੇ ਵਿਰੁੱਧ ਨਹੀਂ ਸੋਚ ਸਕਦਾ। ਮੈਂ ਹਿੰਦੀ ਵਿਚ ਜਿਹੜਾ ਮੈਗਜ਼ੀਨ ਕੱਢ ਰਿਹਾ ਹਾਂ ਉਸ ਵਿੱਚ ਪੰਜਾਬੀ ਅਤੇ ਬਾਣੀ ਨਾਲ ਜੁੜੇ ਹੋਏ ਮਸਲਿਆ ਨੂੰ ਸਾਹਮਣੇ ਲਿਆਉਣ ਦੀ ਕੋਸ਼ਿਸ਼ ਕਰ ਰਿਹਾ ਹਾਂ। ਇਸ ਹਾਲਤ ਵਿਚ ਮੇਰੀ ਪ੍ਰਧਾਨਗੀ ਸਮੇਂ ਕੀਤੀ ਗਈ ਕਿਸੇ ਵੀ ਟਿੱਪਣੀ ਨਾਲ ਜੇ ਕਿਸੇ ਦੇ ਵੀ ਮਨ ਨੂੰ ਠੇਸ ਪਹੁੰਚੀ ਹੈ ਤਾਂ ਇਸ ਵਾਸਤੇ ਮੈਂ ਤਹਿ ਦਿਲੋਂ ਮਾਫ਼ੀ ਮੰਗਦਾ ਹੋਇਆ ਬੇਨਤੀ ਕਰਦਾ ਹਾਂ ਕਿ ਮੇਰੇ ਵਰਗੇ ਅਕਾਮਿਸ਼ਨਾਂ ਨੂੰ ਭਾਸ਼ਾ ਦੀ ਸਿਆਸਤ ਵਿਚ ਘੜੀਸਣ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।
ਜ਼ਿਕਰਯੋਗ ਹੈ ਕਿ ਡਾ. ਹੁਕਮ ਚੰਦ ਰਾਜਪਾਲ ਉੱਤੇ ਪੰਜਾਬੀ ਲੇਖਕ ਸਭਾ ਸੇਖੋਂ ਦੇ ਪ੍ਰਧਾਨ ਡਾ. ਤੇਜਵੰਤ ਮਾਨ ਦਾ ਵੱਡਾ ਦੋਸ਼ ਹੈ ਕਿ ਡਾ. ਰਾਜਪਾਲ ਨੇ ਉਸ ਨੂੰ ਧਮਕੀ ਦਿੱਤੀ ਹੈ ਕਿ ‘ਦੋ ਸਾਲ ਠਹਿਰ ਜਾਓ ਉਸ ਤੋਂ ਬਾਅਦ ਦੱਸਾਂਗੇ ਹਿੰਦੀ ਕੀ ਹੈ’ ਹਾਲਾਂ ਕਿ ਇਸੇ ਬਲਾਗ ਵਿਚ ਪਹਿਲਾਂ ਡਾ. ਰਾਜਪਾਲ ਦਾ ਸਪਸ਼ਟੀਕਰਨ ਆਇਆ ਹੈ ਉਸ ਨੇ ਇਹ ਦੋਸ਼ ਨਕਾਰੇ ਸੀ। ਪਰ ਡਾ. ਤੇਜਵੰਤ ਮਾਨ ਇਸ ਗੱਲ ਤੇ ਅੜੇ ਹੋਏ ਹਨ ਕਿ ਡਾ. ਰਾਜਪਾਲ ਨੇ ਉਸ ਨੂੰ ਧਮਕੀ ਦਿੱਤੀ ਹੈ, ਇਸ ਸਮਾਗਮ ਵਿਚ ਆਰਐਸਐਸ ਦੇ ਕਾਰਕੁਨ ਵੀ ਬੁਲਾਏ ਹੋਏ ਸਨ। ਇਸ ਪੂਰੇ ਮੁੱਦੇ ਤੇ ਪਹਿਲਾਂ ਹੀ ਬਲਾਗ ਵਿੱਚ ਲਿਖਿਆ ਜਾ ਚੁੱਕਾ ਹੈ।